తెలుగులో పరిశోధన : శైలీ పత్ర సమస్యలు

వ్యాస లక్ష్యం
వ్యాసం యొక్క ప్రధాన లక్ష్యం తెలుగు పరిశోధనలో శైలీ పత్ర ఆవశ్యకతను వివరించడం, ఆంగ్లంలో ఉన్న వివిధ రకాల శైలీ  పత్రాలను పరిచయం చేయడం, ఆంగ్ల శైలీ  పత్రాలను తెలుగు పరిశోధనకు అన్వయం చేసినప్పుడు ఎదురయ్యే సమస్యలను గుర్తించడం, తెలుగులో శైలీ  పత్ర రూపకల్పనకు మార్గాలను గుర్తించడం.

వ్యాస పరిమితి
ఈ వ్యాసంలో కేవలం శైలీ  పత్రానికి సంబంధించిన అంశం మాత్రమే చర్చించడం జరిగింది. అనువాదంలో ఉన్న సమస్యల కారణంగా వ్యాసంలో పలు చోట్ల సమాచారాన్ని ఆంగ్లంలో పేర్కొనడం జరిగింది

పరిచయం
తెలుగులో మొట్టమొదటి పరిశోధన 1928లో వెలువడింది. విశ్వవిద్యాలయాల ప్రారంభంలో పరిమిత సంఖ్యలో ఉన్న పరిశోధక విద్యార్థుల సంఖ్య నేడు గణనీయంగా పెరిగింది. తెలుగులో ప్రతి సంవత్సరం చెప్పుకోదగిన స్థాయిలో విశ్వవిద్యాలయాలలో పరిశోధన గ్రంథాలు వెలువడుతున్నాయి. వివిధ రూపాలలో పరిశోధన కొనసాగుతూనే ఉంది. సాహిత్యంలో పలు రకాలైన నూతన ప్రక్రియలు వెలువడ్డాయి. సాహిత్య ప్రక్రియల విస్తృతి పెరిగే కొద్దీ పరిశోధనా పద్ధతులూ  మారుతూ వస్తున్నాయి. సాహిత్య వస్తువులోనూ మార్పు చోటు చేసుకొంది. సాహిత్య వస్తువును, ప్రక్రియను బట్టి పరిశోధనా విధానంలో మార్పులు చోటు చేసుకుంటున్నాయి. వివిధ రకాలుగా పరిశోధనలు జరుగుతున్నప్పటికీ, విశ్వవిద్యాలయాలలో జరిగే పరిశోధనకు ఒక ప్రత్యేక స్థానం ఉంది. అందుకు గల కారణం  విశ్వవిద్యాలయాలలో క్రమబద్ధమైన పరిశోధనా విధానాన్ని అనుసరించడం.  విశ్వవిద్యాలయాలలో తొలిదశలో  జరిగిన పరిశోధనా పద్ధతి (1928 నుంచి 1975వరకు) చెప్పుకోదగిన స్థాయిలో ఉందనేది విమర్శకుల అభిప్రాయం. మలిదశలో జరిగిన పరిశోధనా పద్ధతిలో  (1975 నుంచి  2000 వరకు ) ప్రముఖమైన ఆచార్యుల పర్యవేక్షణలో పరిశోధనా గ్రంథాలు వెలువడ్డాయి. తొలినాళ్లలో పరిశోధనా విధానం అనేది ఆయా పరిశోధకులే తమ పరిశోధనా గ్రంథానికి అనుగుణంగా ఒక పద్ధతిని నిర్మించుకున్నారు. పరిశోధన చేసే అంశాన్ని బట్టి పరిశోధనా పద్ధతి మారుతూ వచ్చింది. విశ్లేషణా పద్ధతి, తార్కిక పద్ధతి మొదలైన వాటిని అవలంబించారు. 1975 తరువాత విశ్వవిద్యాలయాల్లో పరిశోధనా విధానాన్ని ప్రవేశపెట్టారు. ఈ పరిశోధనా పద్ధతిలో పరిశోధకుడు పరిశోధనా సమస్యను ఎలా ఎన్నుకోవాలి? పరిశోధనా ప్రణాళికను ఎలా రూపొందించుకోవాలి? ఏ విధంగా సిద్ధాంత వ్యాసం రాయాలి? మొదలైన విషయాలను వివరించారు. సిద్ధాంత గ్రంథ రూపంలో గ్రంథ పూర్వభాగం, గ్రంథ భాగం, ఆధార విషయ వివరణ అనే భాగాలుగా  విభజించి వివిధ భాగాలలో ఉండవలసిన అంశాలను వివరించారు. ప్రస్తుతం పరిశోధకులు తమ సిద్ధాంత గ్రంథాలను ఈ పరిశోధనా పద్ధతిలోనే చేస్తున్నారు.

అయితే సమకాలీన కాలంలో తెలుగులో జరుగుతున్న పరిశోధనా పద్ధతిపై (2000 తరువాత) భిన్నమైన అభిప్రాయాలు ఉన్నాయి. ముఖ్యంగా పరిశోధన విధానంలో లోపాలు ఉన్నట్లు స్పష్టంగా తెలుస్తుంది. అందుకు పలు కారణాలు ఉన్నాయి. విశ్వవిద్యాలయాల సంఖ్య పెరగడం, పరిశోధకుల సంఖ్య అధికం కావడం, అధ్యాపకుల కొరత ఉండడం మొదలైన కారణాలు ఉన్నాయి. కొన్ని విశ్వవిద్యాలయాలలో  పరిశోధక విద్యార్థులకు పరిశోధనా పద్ధతులను బోధించడంలో వైఫల్యం కనిపిస్తూ ఉంది. ముఖ్యంగా శైలీ  పత్రం పైన అవగాహన లేకపోవడంతో అనేక రకాలైన లోపాలు పరిశోధనా గ్రంథాల్లో కనిపిస్తూ ఉన్నాయి.

శైలీ  పత్రాన్ని అనుసరించడం అనేది పరిశోధన విధానంలో అత్యంత ముఖ్యమైన విషయం. ఆంగ్లంలో ఒక్కొక్క విభాగానికి వివిధ శైలీ  పత్రాలు అమలులో ఉన్నాయి. MLA, Chicago, APA,  AAA, CSE , AMA , ACS, Bluebook Stylesheet, ALWD, The New York Times Manual of Style and Usage, MHRA, Associated Press (AP), Cambridge Style of Referencing మొదలైన శైలీ పత్రాలు (Style  Sheets) లభిస్తూ ఉన్నాయి. అయితే తెలుగులో శైలీపత్రం విషయంలో అనేక రకాలైన సమస్యలు ఉన్నాయి. తెలుగుకు ఒక ప్రత్యేకమైన శైలీ  పత్రం లేదు. కానీ తెలుగులో పరిశోధనా పద్ధతికి సంబంధించిన గ్రంథాలు మాత్రం ఉన్నాయి. గంధం అప్పారావు-కాళిదాసు సూర్యనారాయణ – పరిశోధనా పద్ధతులు (1985), డాక్టర్ జయప్రకాష్ – పరిశోధనా విధానం (1990), డాక్టర్ ఆర్. వి. ఎస్. సుందరం – పరిశోధనా పద్ధతులు (1990), ఆచార్య రాచపాళెం  చంద్రశేఖర్ రెడ్డి, హెచ్. ఎస్. బ్రహ్మానంద – సాహిత్య పరిశోధన సూత్రాలు (1997), కుసుమాబాయి , ఎం. కులశేఖర రావు – పరిశోధన సూత్రాలు (2000), బూదరాజు రాధాకృష్ణ : తెలుగు భాషా స్వరూపం (2001), ఆచార్య పులికొండ సుబ్బాచారి – పరిశోధన విధానం (2014), పి. సత్యనారాయణ – సామాజిక శాస్త్రాల్లో పరిశోధన విధానం (2015), ఆచార్య గంగిశెట్టి లక్ష్మీనారాయణ- సాహిత్య పరిశోధన కళ: విధానం (2017) మొదలైన పుస్తకాలు లభిస్తున్నాయి. పైన పేర్కొన్న పుస్తకాలన్నీ  దాదాపు పరిశోధనా విధానానికి సంబంధించిన అంశాలను చర్చిస్తాయి. కానీ శైలీ  పత్రానికి సంబంధించి ఒక ప్రత్యేకమైన విధానం ఉన్నట్లు కనిపించదు. ఆంగ్లంలో ఉన్న శైలీ  పత్రాలను తెలుగులో పేర్కొనే ప్రయత్నం చేశారు, కానీ ఒక తెలుగు పరిశోధనకు అవసరమైన ఒక్క ప్రత్యేకమైన శైలీ  పత్రాన్ని రూపొందించే ప్రయత్నం చేసినట్లు కనిపించదు. శైలీ పత్రాన్ని ఒక ప్రత్యేక అంశంగా బోధించక పోవడం వలన పరిశోధక విద్యార్థులు పలు సమస్యలను ఎదుర్కొంటున్నారు. ఆంగ్లంలో ఉన్న MLA, APA, CHICAGO  మొదలైన శైలీ  పత్రాలను తెలుగులో ఉపయోగించడం వలన పరిశోధనా పద్ధతిలో కొన్ని ఇబ్బందులు ఉన్నాయి.

పరిశోధనా విధానం
పరిశోధనా విధానం అనేది ఎంపిక చేసిన అంశాలను ప్రారంభం నుండి చివరి వరకు పరిశోధించే వ్యూహం. సాహిత్య సమీక్షలు, పరిశోధనా పరిమితి, సేకరించిన సమాచారాన్ని ఆధారాలతో నిరూపణ, సిద్ధాంత గ్రంథం ముగింపు వరకు అవలంబించే శాస్త్రీయ పద్ధతినే పరిశోధనా విధానం అని చెప్పవచ్చు.  

పరిశోధనకు సంబంధించి అనేక నిర్వచనాలను వివిధ పరిశోధకులు పేర్కొని ఉన్నారు.  వ్యాస పరిమితి కారణంగా వాటిని ఇక్కడ పేర్కొనడం లేదు.  

శైలీ పత్రం (Style sheet) అంటే..
శైలీపత్రం అనేది నిర్దిష్ట అంశాల జాబితా, వాటిని ప్రదర్శించడానికి పరిశోధకుడు/రచయిత ఎంచుకున్న విధానం, ఒక నిర్దిష్ట పదం లేదా పదబంధం యొక్క విరామ చిహ్నాలు, సంఖ్యలు, తేదీలు మొదలైనవాటిని తెలియజేస్తుంది. శైలీపత్రం (Style sheet) అనేది ఒక పత్రం (document) యొక్క దృశ్య ప్రదర్శనను  (visual presentation) ఒక పద్ధతిలో చేయడానికి సూచనలు లేదా నియమాలను కలిగి ఉన్న రచన, సాధారణంగా వెబ్ డెవలప్ మెంట్ లేదా టైప్ సెట్టింగ్ సందర్భంలో దీనిని CSS (కాస్కేడింగ్ స్టైల్ షీట్స్), XSL (ఎక్స్టెన్సిబుల్ స్టైల్ షీట్ లాంగ్వేజ్) లేదా DSSSL (డాక్యుమెంట్ స్టైల్ సెమాంటిక్స్ అండ్ స్పెసిఫికేషన్ లాంగ్వేజ్) వంటి వివిధ భాషల్లో రాయవచ్చు.  

CSS (కాస్కేడింగ్ స్టైల్ షీట్స్): CSS అనేది ప్రజంటేషన్ మరియు కంటెంట్ ను వేరుచేసే విస్తృతంగా ఉపయోగించే స్టైల్ షీట్  శీర్షికలు, పేరాగ్రాఫ్ లు మరియు పట్టికలు వంటి ఒక పరిశోధన యొక్క వివిధ అంశాల శైలిని నిర్వచించడానికి దీనిని ఉపయోగిస్తారు.

XSL (ఎక్స్టెన్సిబుల్ స్టైల్షీట్ లాంగ్వేజ్): XSL అనేది ఒక స్టైల్ షీట్ లాంగ్వేజ్, ఇది XML డాక్యుమెంట్ లను HTML లేదా PDF వంటి ఇతర ఫార్మాట్ లుగా మార్చడానికి ఉపయోగించబడుతుంది. అధ్యాయాలు, విభాగాలు మరియు ఉప విభాగాలు మొదలైన అంశాల శైలిని నిర్వచించడానికి దీనిని ఉపయోగించవచ్చు. 

వర్డ్ ప్రాసెసింగ్ సాఫ్ట్ వేర్: మైక్రోసాఫ్ట్ వర్డ్ లేదా గూగుల్ డాక్స్ వంటి చాలా వర్డ్ ప్రాసెసింగ్ సాఫ్ట్వేర్లలో బిల్ట్-ఇన్ స్టైల్షీట్ ఫంక్షనాలిటీ కూడా ఉంటుంది. శీర్షికలు, పేరాగ్రాఫ్ లు మరియు ఉల్లేఖనాలు వంటి  వివిధ అంశాలకు స్థిరమైన ఫార్మాటింగ్ సృష్టించడానికి ఈ శైలీ  పత్రాలు అనుమతిస్తాయి.

శైలీ పత్రాల ఉపయోగాలు
అకడమిక్ పరిశోధనలో శైలీ పత్రాల ప్రధాన ప్రయోజనం పరిశోధకుడు పరిశోధనా పనిని సరిగ్గా అర్థం చేసుకోవడం, దాని నిర్మాణాన్ని  నిర్ణయించడం.

ఒక  స్థిరమైన ఉల్లేఖన పద్ధతి (Reference Format) ద్వారా పాఠకులు ఏదైనా ఇన్-టెక్స్ట్ మూలాన్ని ఉపయోగించి పరిశోధనా గ్రంథంలోని ఉల్లేఖనాలను సులభంగా సమీక్షించవచ్చు. ఫుట్ నోట్ లు లేదా ఎండ్ నోట్ లు ఒక పద్ధతిలో పేర్కొనవచ్చు.
కొటేషన్ ఎక్కడ నుండి వచ్చిందో అర్థం చేసుకోవడానికి ఇది సహాయపడుతుంది.
సరైన ఉల్లేఖనాలు పాఠకులను తెలుసుకోవడానికి ప్రోత్సహిస్తాయి. ప్రమాణాలకు అనుగుణంగా పనిచేస్తాయి.
పరిశోధన యొక్క మూలం, భావన, దాని అనుకూలత, ఔచిత్యాన్ని పరీక్షించడానికి, గుర్తించడానికి శైలీ పత్రం సహాయపడుతుంది. ఖచ్చితమైన డేటా లేదా రికార్డులు ఇందులో ఉపయోగించబడతాయి.

పరిశోధకుడు ఇతరుల అభిప్రాయాలతో  ఏకీభవించినా, ఏకీభవించక పోయినా  వారి మాటలను ఉపయోగించినప్పుడు, వారికి గుర్తింపు (credit) ఇవ్వాలి.  అది కొటేషన్ గుర్తులు మరియు ఉదాహరణలు రెండింటిని ఉపయోగించడం ద్వారా రెఫరెన్స్ గా చెప్పడానికి ఉపయోగపడతాయి.

పరిశోధకుడు  ఉపయోగించిన సమాచారాన్ని పాఠకులకు మార్గనిర్దేశం చేయడం, తద్వారా తరువాత పరిశోధకులు వాటిని తిరిగి పరిశీలించడానికి అవకాశం ఉంది.

రెఫరెన్సు  (ఉల్లేఖనం) అంటే…
రెఫరెన్సు అనేది ఒకరి పనిని  గుర్తించడానికి ఉపయోగించే ఒక పద్ధతిగా నిర్వచించవచ్చు. పరిశోధకుడి ఆలోచనకు మద్దతు ఇవ్వడానికి/వ్యతిరేకించడానికి ఇతరుల పనిని ఉదాహరించడం. ఒక రెఫరెన్స్ లో  సాధారణంగా రచయిత పేరు, రచన పేరు,  ప్రచురణ తేదీ, మరియు ప్రాంతం పేరు ఉంటాయి. ప్రచురణ సంస్థ యొక్క శీర్షిక, పత్రిక యొక్క శీర్షిక లేదా పుస్తకం పేరు, పరిశోధన శీర్షిక  మొదలైన అంశాలు ఉంటాయి.  రెఫరెన్సు రెండు స్థాయుల్లో చేయబడుతుంది.  ముందుగా క్లుప్తంగా.. ‘ఇన్-టెక్స్ట్ సైటేషన్’ అని పిలువబడే టెక్స్ట్ బాడీలో రెఫరెన్స్‌, రెండవది వివరణాత్మక రెఫరెన్స్…డాక్యుమెంట్ చివర జాబితా రూపంలో ఉంటుంది.

రెఫరెన్సింగ్ (ఉల్లేఖనం) యొక్క ఉద్దేశ్యాలు
అకడమిక్ రచనలో రెఫరెన్సింగ్ ఒక అవసరమైన అంశం. పని మూలాన్ని కనుగొనడానికి ఉపయోగించబడుతుంది, తద్వారా ప్రతి ఒక్కరూ సమాచారాన్ని ఉపయోగించుకోవచ్చు. మరొక ఉద్దేశ్యం గ్రంథ చౌర్యాన్ని (plagiarism) దూరం చేయడం.

శైలీ పత్రం యొక్క నిర్మాణం
శైలీ పత్రంలో  నాలుగు అంశాలు:
1. సాధారణ వ్యాఖ్యలు: ఇందులో వ్యాసం యొక్క ఉద్దేశ్యం, చదివే ప్రేక్షకులు లేదా ఇతర ప్రత్యేక సూచనల గురించి గమనికలు ఉండవచ్చు.
2. శైలీకి సంబంధించిన విషయాలు
స్పెల్లింగ్ సంప్రదాయాలు: ఈ విభాగంలో, అసాధారణ పదాలను, ముఖ్యంగా పరిశోధకుడు పేర్కొంటున్న కొత్త పదాలను నిక్షిప్తం చేస్తారు.
వ్యాకరణం: వ్యాకరణ సమస్యలను నోట్ చేసుకోవడం  (ఏకవచన సర్వనామంగా ‘వారు’ ఉపయోగించడం వంటివి).
విరామ చిహ్నాలు: విరామ చిహ్నాల గురించి ప్రత్యేక శ్రద్ధ వహించడం : ఏకవచనానికి ‘లు’ జోడించాలా? (ఉదాహరణకు, ‘మార్క్స్ సిద్ధాంతాలు’) లేక సాధారణ పద్ధతిలో పేర్కొనాలా …మొదలైనవి.
3. ఫార్మాటింగ్: ఇటాలిక్స్ చేయాల్సిన అవసరం, ఉప శీర్షికలను బోల్డ్ లో ఉంచడం మొదలైన అంశాలు
4. అదనపు వ్యాఖ్యలు: మునుపటి అంశాలకు చెందని ఇతర ముఖ్య విషయాలను జోడించడం.

ఆంగ్లంలోని వివిధ శైలీపత్రాల క్లుప్త పరిచయం

ఎమ్మెల్యే స్టైల్ షీట్: ఎమ్మెల్యే హ్యాండ్ బుక్ 9వ ఎడిషన్: (MLA)
ఎమ్మెల్యే హ్యాండ్ బుక్ ను గతంలో ఎమ్మెల్యే హ్యాండ్ బుక్ ఫర్ రైటర్స్ ఆఫ్ రీసెర్చ్ పేపర్స్ (1977–2009) అని పిలిచేవారు. ఇది మొట్టమొదట 1951 లో యునైటెడ్ స్టేట్స్ ఆఫ్ అమెరికా యొక్క ఆధునిక భాషా సంఘంచే ప్రచురించబడింది. 1977 నుంచి 1999 వరకు వెలువడిన తొలి ఐదు ఎడిషన్లతో 28 పేజీల సదస్సుల సమాహారంగా ఎమ్మెల్యే హ్యాండ్ బుక్ తన ప్రయాణాన్ని ప్రారంభించింది. ఆ తర్వాత దీనికి ఎమ్మెల్యే హ్యాండ్ బుక్ ఫర్ రైటర్స్ ఆఫ్ రీసెర్చ్ పేపర్స్, థీసిస్, డిసెర్టేషన్స్ అనే పేరు పెట్టారు. 2003 ఆరవ ఎడిషన్ కు ఎమ్మెల్యే హ్యాండ్ బుక్ ఫర్ రైటర్స్ ఆఫ్ రీసెర్చ్ పేపర్స్ అని పేరు పెట్టారు.

APA Style Sheet
పరిశోధకులు, ఉపాధ్యాయులు, వైద్యులు, సలహాదారులు మరియు విద్యార్థులతో సహా 1,46,000 మందికి పైగా సభ్యులను కలిగి ఉన్న అమెరికన్ సైకలాజికల్ అసోసియేషన్ (APA ), యునైటెడ్ స్టేట్స్ మనస్తత్వవేత్తల అతిపెద్ద శాస్త్రీయ మరియు వృత్తిపరమైన సంఘం. పాఠకులకు శాస్త్రీయ రచనను చదవడం సులభతరం చేయడానికి, మనస్తత్వవేత్తలు, మానవ శాస్త్రవేత్తలు మరియు వ్యాపార నిర్వాహకుల సమూహం 1929 లో సమావేశమై సరళమైన ప్రక్రియలు లేదా శైలీ  మార్గదర్శకాలను రూపొందించడానికి బయలుదేరింది. ఇది 2009 లో దాని ఆరవ ఎడిషన్ లో విడుదలైంది, అప్పటి నుండి ఇది అనేక మార్పులకు గురైంది.

Chicago Manual of Style
చికాగో ఒక డాక్యుమెంటేషన్ శైలి 1906 నుండి చికాగో యూనివర్శిటీ ప్రెస్ ద్వారా ప్రచురించబడింది. ఈ ఉల్లేఖన శైలీ లో అమెరికన్ ఆంగ్లంలో సాధారణమైన వ్యాకరణం మరియు విరామ చిహ్నాల నియమాలు ఉన్నాయి. చికాగో శైలీపత్రం  రెండు ప్రాథమిక డాక్యుమెంటేషన్ వ్యవస్థలను అందిస్తుంది. సాహిత్యం, చరిత్ర మరియు కళలతో సహా మానవీయ శాస్త్రాలలో చాలా మంది శైలీపత్రాన్ని ఇష్టపడతారు.
ఒక్కొక్క శైలీ పత్రం ఒక్కొక్క రచనా పద్ధతిని అనుసరిస్తున్నాయి. పరిశోధకుడు తన పరిశోధనకు అనుకూలమైన శైలీ పత్రాన్ని ఎంపిక చేసుకోవడం ఉత్తమం.

తెలుగులో శైలీపత్ర సమస్యలు

Intext Citation:
ఈ పద్ధతిని ఉపయోగించడం వలన తెలుగులో కొన్ని ప్రత్యేక సమస్యలు ఉన్నాయి. కేవలం రచయిత ఇంటిపేరు సంవత్సరం, పుట ఇవ్వడం వలన పాఠకుడికి స్పష్టమైన సమాచారం తెలుసుకోవడం కష్టం అవుతుంది. ఉదాహరణకు  ముదిగొండ అనే ఇంటి పేరుతో ముదిగొండ వీరభద్రయ్య, ముదిగొండ శివప్రసాద్, ముదిగొండ వీరభద్రరావు పలు రచనలు చేశారు. అలాగే కొలకలూరి ఇంటి పేరుతో కొలకలూరి ఇనాక్, కొలకలూరి మధుజ్యోతి, కొలకలూరి ఆశాజ్యోతి.. రచయితలుగా తెలుగులో ఉన్నారు. కేవలం ఇంటిపేరునే సూచించి పుస్తకం పేరు ఇవ్వకపోతే చాలా ఇబ్బందులు వస్తాయి. అలాగే ఒకే సంవత్సరము ఒక రచయిత ఒకటి కంటే ఎక్కువ పుస్తకాలు రచించినప్పుడు పాఠకుడికి ఏ పుస్తకాన్ని పరిశోధన గ్రంథంలో పేర్కొన్నారో తెలియదు.

ఫాంట్ (ఖతి) మరియు ఇతర సమస్యలు :
ఆంగ్లంలో Times new Roman ఫాంట్ అనేటువంటిది పరిశోధన గ్రంథంలో ఉపయోగిస్తున్న ఖతి. ఫాంట్ సైజ్ 12లో ముద్రిస్తున్నారు. కానీ తెలుగులో ఎక్కువగా ఉపయోగించేది అను ఫాంట్స్, యూనికోడ్ ఫాంట్స్. సిద్ధాంత గ్రంథానికి సంబంధించి ఒక ప్రత్యేకమైన ఫాంట్ సైజు లేదు. పరిశోధకుడు ఫాంటు సైజును తన పరిశోధన గ్రంథంలో ఉన్న పుటలను బట్టి నిర్ణయించుకుంటున్నాడు. కొంతమంది పరిశోధకులు ఫాంట్ సైజ్ 20 ఉపయోగిస్తుంటే మరి కొంతమంది పరిశోధకులు 16 ఫాంట్ సైజు ఉపయోగిస్తున్నారు.  ఒక ప్రామాణికమైన పద్ధతి లేదు.
Capital letters, Small letters, Articles: ఆంగ్లంలో ఎక్కడ క్యాపిటల్ లెటర్స్ వాడాలి ఎక్కడ స్మాల్ లెటర్స్ వాడాలి? ఎక్కడ ఆర్టికల్స్ వాడాలి? అంశానికి సంబంధించి ప్రత్యేకమైన నియమాలు ఉన్నాయి. తెలుగులో అటువంటి నియమాలు లేవు.

Italics:
ఆంగ్లంలో పుస్తకానికి సంబంధించిన శీర్షికను ఇటాలిక్సులో ఉపయోగిస్తారు. అలా ఉపయోగించడం వలన  పుస్తకం యొక్క శీర్షిక ప్రత్యేకంగా కనిపిస్తుంది. కానీ తెలుగులో చాలామంది పరిశోధకులు ఈ పద్ధతిని అనుసరించడం లేదు.

ఆధార గ్రంథాలు vs ఉపయుక్త గ్రంథాలు:
పరిశోధకుడు పరిశోధనకు ఎంపిక చేసుకున్న ప్రధానమైన అంశాన్ని ప్రధాన ఆధార విషయంగా, రచనలను ఆధార గ్రంథాలుగా పేర్కొంటారు. శాసనాలు, మౌఖిక సమాచారం పత్రికలు మొదలైన అంశాలపై పరిశోధన చేస్తున్నప్పుడు ఆయా అంశాలు ప్రధాన విషయాలుగా పరిశోధకుడు పేర్కొనవచ్చు. ప్రధాన విషయాన్ని విశ్లేషిస్తున్న సందర్భంలో వివిధ రకాల సమాచారాన్ని పరిశోధన గ్రంథంలో ఉపయోగించవలసి ఉంటుంది. అలా ఉపయోగించుకున్న సమాచారాన్ని ఉపయుక్త గ్రంథ సూచికలో పేర్కొంటారు. ఉపయుక్త గ్రంథ సూచికలో పుస్తకాలను అక్షర క్రమంలో పేర్కొనడం అనేటువంటిది ముఖ్యమైన అంశం. అక్షర క్రమంలో పేర్కొన్న సందర్భంలో సంఖ్యలను (Numbers)  పేర్కొనవలసిన అవసరం లేదు . తెలుగులో కొంతమంది పరిశోధకులు ఉపయుక్త గ్రంథ సూచికలో ఒక పద్ధతి అనేది లేకుండా వారికి నచ్చినట్లు ఆధార గ్రంథాలను పేర్కొంటున్నారు. చాలా సందర్భాలలో ఆధార గ్రంథాలకు ఉపయుక్త గ్రంథ సూచికకు భేదం తెలియడం లేదు. ఆధార గ్రంథాలను, ఉపయుక్త గ్రంథాలను ప్రత్యేకంగా పేర్కొనవలసిన ఆవశ్యకత ఉంది. 

ముఖపత్రం, అలంకారాలు ఉపయోగించడం :
కొంతమంది పరిశోధకులు తెలుగుతోపాటు ఆంగ్లంలో కూడా శీర్షికను పేర్కొంటున్నారు అటువంటి సందర్భంలో తెలుగులో ఉన్న పదానికి ఆంగ్లంలో ఉన్న పదానికి సంబంధించిన స్పెల్లింగ్ చూడాలి. ఒకవేళ అవసరార్థం తెలుగు శీర్షికను ఆంగ్లంలో ఉపయోగించాలి అనుకుంటే phonetic chartను ఉపయోగించి రోమన్ స్క్రిప్ట్ లో పేర్కొనటం  ఉత్తమం. ఆంగ్లంలో ఉన్న శైలీ పత్రాన్ని అనుసరించి ముఖపత్రానికి ఏ రకమైనటువంటి అలంకారాలు ఉపయోగించకూడదు. కానీ తెలుగులో విభిన్నమైనటువంటి అలంకారాలు రంగులను ఉపయోగించి ముఖపత్రాన్ని ముద్రిస్తున్నారు.    

పుట సంఖ్య (page number):
పరిశోధన గ్రంథంలో పుట సంఖ్యను పేర్కొనేటప్పుడు పాఠకుడికి తెలిసేలా సౌకర్యవంతంగా ఉండాలి. కొన్ని సందర్భాలలో కొంతమంది పరిశోధకులు పరిశోధన గ్రంథంలో ఎడమవైపు చివర పుట సంఖ్య ఇవ్వడం వలన బైండింగ్ లో ఉన్న సమస్యల కారణంగా పుటసంఖ్య సరిగా కనిపించదు.

అధ్యాయాల విభజన:
ఆంగ్ల శైలీ పత్రాలను అనుసరించి ఒక సిద్ధాంత గ్రంథంలో నాలుగు నుంచి ఆరు అధ్యాయాలు ఉండడం సమంజసంగా ఉంటుందని పేర్కొంటారు. అలాగే ప్రతి అధ్యాయంలో ఉన్న పుటల సంఖ్య దాదాపు ఒకే విధంగా ఉండాలి అని పేర్కొన్నారు. కానీ తెలుగులో అధ్యాయాల విభజన, సంఖ్య రెండు కూడా భిన్నంగానే ఉంటాయి. కొన్ని సిద్ధాంత గ్రంథాలలో ఒక అధ్యాయం 100 పేజీలు ఉంటే మరొక అధ్యాయం 10 పేజీలలో ముగుస్తుంది. కొంతమంది పరిశోధకులు సిద్ధాంత గ్రంథాన్ని 10 అధ్యాయాలకు పైగా విభజించి నచ్చిన పద్ధతిలో పుటల సంఖ్యను ఉంచుతున్నారు.  

ఒక ప్రాంతానికే పరిమితమైన పదాలు లేదా మాండలిక పదాలు:
ఆంగ్లంలో ప్రత్యేకమైన పదాలను ఫుట్ నోట్సుల కింద వివరంగా పేర్కొంటారు. అలాగే తెలుగు భాషకు లేదా ఒక ప్రాంతానికే పరిమితమైన కొన్ని పదాలను ఫుట్ నోట్సుల కింద వివరంగా పేర్కొనాల్సిన అవసరం ఉంది. ఉదాహరణకు రాయలసీమ ప్రాంతంలో మోడీ కాళ్లు, తిరమందారులు అనేవి ఒక  సంప్రదాయ విధానంతో నివసిస్తున్న వర్గాన్ని తెలియజేసేటువంటిది. వీరి మధ్య వివాహ సంప్రదాయాలు కొనసాగవు. ఇటివంటి విషయాలను ప్రత్యేకంగా వివరించాలి.

అనుబంధాలు:
పరిశోధకుడు పరిశోధన చేస్తున్న సందర్భంలో వివిధ రకాలైన అదనపు సమాచారం లభిస్తుంది. ఆ అదనపు సమాచారాన్ని పేర్కొనడం వలన సిద్ధాంత గ్రంథానికి పాఠకుడికి ఉపయోగం ఉంటుందని భావించినప్పుడు ఆ సమాచారాన్ని అనుబంధంలో పేర్కొనవచ్చు.

తెలుగు పరిశోధన గ్రంథాలలో శైలీ పత్రానికి సంబంధించి గమనించిన విషయాలు:
కొన్ని సందర్భాలలో కొందరు పరిశోధకులు రెండు మూడు శైలీ  పత్రాలను సిద్ధాంత గ్రంథంలో ఉపయోగించడం జరుగుతూ ఉంది.
సిద్ధాంత గ్రంథంలో అనుకూలమైన చోట అనుకూలమైన శైలీ పత్రాన్ని ఉపయోగిస్తున్నారు.
కొన్ని సిద్ధాంత గ్రంథాలలో ఏ రకమైన శైలీ పత్రాన్ని అనుసరించకుండా నచ్చిన పద్ధతిలో రెఫరెన్సులు ఇస్తూ వెళ్తున్నారు.
మరికొంతమంది పరిశోధనా పద్ధతిలో శైలీ  పత్రం అంటే ఏమిటో కూడా తెలియడం లేదు.

ముగింపు :   ఇటీవల కాలంలో పరిశోధనా పద్ధతి పైన సదస్సులు కానీ, కార్యశాలలుగానీ  జరగడం లేదు. ఈ కారణం వలన పరిశోధన గ్రంథాన్ని రచిస్తున్నప్పుడు పలు రకాలైన సమస్యలు పరిశోధకుడికి ఎదురవుతున్నాయి. MLA Style Sheet అయిదు ఎడిషన్ ను ఇప్పటికీ  ఉపయోగించడం జరుగుతూవుంది. దీని తర్వాత MLA ఎడిషన్ లో అనేక రకాలైనటువంటి మార్పులు చోటుచేసుకున్నాయి ముఖ్యంగా ఎలక్ట్రానిక్ సోర్సెస్, ఆడియో వీడియో ఫైల్స్ మొదలైన వాటిని సిద్ధాంత గ్రంథంలో పొందుపరచడంలో అవగాహన లేక చాలా ఇబ్బందులు ఎదుర్కొంటున్నారు వీటన్నిటికీ పరిష్కారంగా ఒక ప్రామాణికమైన శైలీ పత్రాన్ని రూపొందించాల్సిన అవసరం ఉంది. వీటితో పాటు ప్రస్తుతం అంతర్జాతీయంగా పరిశోధన పద్ధతిలో వచ్చిన విషయాలు తెలుగు పరిశోధకులకు తెలియజేయవలసిన అవసరం ఉంది. MLA స్టైల్ షీట్ లో 29 రకాల ఉల్లేఖనాల పద్ధతులు ఉన్నాయి. వాటిని తెలుగు భాష, సంస్కృతులకు అనుగుణంగా. మార్చుకొని ఉపయోగించుకోవలసిన ఆవశ్యకత తెలుగు పరిశోధనకు ముఖ్యం.

ఉపయోగించుకున్న పుస్తకాలు:

తెలుగు
1. చంద్రశేఖర్‌ రెడ్డి, రాచపాళెం., బ్రహ్మానంద, హెచ్ ఎస్. సాహిత్య పరిశోధన సూత్రాలు. హైదరాబాదు: విశాలాంధ్ర పబ్లిషింగ్ హౌస్, 1997.
2. జయప్రకాష్, ఎస్ . పరిశోధన విధానం హైదరాబాద్ విశాలాంధ్ర పబ్లిషింగ్ హౌస్ 2003.
సుబ్బాచారి, పులికొండ. పరిశోధనా విధానం సిద్ధాంత గ్రంథ రచన. కుప్పం: ద్రావిడ విశ్వవిద్యాలయం 2014.

English
1. ______. MLA Handbook. New York: The Modern Language Association of America, 2021.
2. Hacker, Diana. A Pocket Style Manual, APA Version. Boston: Bedford/St. Martin’s, 2020.
3. Kate L. Turabian. Chicago Guides to Writing, Editing, and Publishing. Chicago: University of Chicago Press, 2022.

_{ఆచార్య వెంకటరామయ్య గంపా}
ఆచార్యులు, ఢిల్లీ విశ్వవిద్యాలయం
99586 07789